ملڪ مان ڦرلٽ ڪري ڀڄي ويندڙ اڄ اسان کي معيشت تي ليڪچر ڏئي رهيا آهن: چوڌري فواد حسين

APP06-160122 LAHORE: January 16 Federal Minister for Information and Broadcasting Chaudhry Fawad Hussain addressing at press club during inauguration ceremony of National Health Card. APP photo by Rana Imran

لاهور – 16 جنوري (اي پي پي) اطلاعات ۽ نشريات واري وفاقي وزير چوڌري فواد حسين چيو آهي ته ملڪ مان ڦرلٽ ڪري ڀڄي ويندڙ اڄ اسان کي معيشت تي ليڪچر ڏئي رهيا آهن، نواز شريف لنڊن جي سڀ کان مهانگي پراپرٽي ۾ ويٺل آهي، آصف علي زرداري لنڊن ۾ چرچل هوٽل جو مهانگو ترين اپارٽمينٽ وٺي رهي ٿو، اڄ ملڪ ۾ مهانگائي جو مسئلو سڌوسنئون انهن سان واڳيل آهي، پاڪستان تحريڪ انصاف جي حڪومت کي پنهنجي 5 سالن ۾ انهن جو ورتل 55 ارب ڊالر قرض واپس ڪرڻو آهي، پيپلزپارٽي جي حڪومت جڏهن وئي ته گئس تي ڪو گردشي قرض نه هو، شاهد خاقان عباسي 157 ارب رپين جو سرڪلر ڊيٽ ڇڏي ويو، جيڪي اسڪيمون انهن شروع ڪيون اهي مڪمل ڪرڻ جي لاءِ ساليانو 90 ارب رپيا گهربل آهن، انهن ماڻهن جي ڪري اڄ ملڪ ۾ مهانگائي درپيش آهي، اسان انهن کي ڪيئن نظرانداز ڪري سگهون ٿا، عمران خان جو پوري ملڪ ۾ ووٽ آهي، پي ٽي آءِ کانسواءِ ڪنهن ٻي سياسي پارٽي ۾ ايتري صلاحيت نه آهي جو اها 1100 سيٽن تي پنهنجا اميدوار بيهاري سگهي، اليڪشن اچڻ ڏيو، ميدان به سامهون هوندو، اسان ڏيکارينداسين ته اليڪشن ڪيئن وڙهبي آهي، انشاءَ الله ايندڙ 5 سال به عمران خان جي حڪومت هوندي. اهڙن خيالن جو اظهار هن لاهور پريس ڪلب جي نئين چونڊيل عهديدارن جي حلف برداري واري تقريب کانپوءِ صحافين سان ڳالهائيندي ڪيو. اطلاعات واري وفاقي وزير چيو ته لاهور جي صحافين کي هيلٿ ڪارڊ جي سهولت فراهم ڪئي وئي آهي، صحافي ۽ انهن جا خاندان ڪنهن به سرڪاري ۽ نجي اسپتال مان 10 لک رپين تائين ساليانو علاج جي سهولت حاصل ڪري سگهندا، اسپتال ۾ داخلا جا سمورا خرچ حڪومت ادا ڪندي، وزيراعظم عمران خان خيبرپختونخواهه مان ان پروگرام جي شروعات ڪئي، جيستائين نجي شعبو صحت ۽ تعليم جي شعبن ۾ شامل نه ٿيندو، مسئلا حل نه ٿيندا. هن چيو ته صحت پروگرام هڪ منفرد پروگرام آهي، هڪ وڏي آبادي ان پروگرام مان فائدو کڻندي، ان سان گڏوگڏ نجي شعبي کي به هيلٿ سيڪٽر ۾ سيڙپڪاري جو موقعو ملندو. هن چيو ته عوام کي سٺيون اسپتالون ۽ سٺو علاج گهرجي. سنڌ حڪومت جيترو پئسو صحت جي شعبي ۾ خرچ ڪري رهي آهي هي پروگرام ان کان اڌ رقم ۾ مڪمل ٿيڻو آهي. سنڌ ۾ هڪ ڊاڪٽر جي پگهار 76 لک رپيا رکي وئي، سنڌ ۾ صحت جو شعبو ۽ سموريون اسپتالون ويهي رهيون آهن. هن چيو ته پاڪستان تحريڪ انصاف جي حڪومت فيصلو ڪيو آهي ته سمورن طبقن کي صحت جون هڪ جهڙيون سهولتون فراهم ڪيون وڃن، اسان امير ۽ غريب ۾ فرق کانسواءِ هڪ جهڙي علاج جي سهولت فراهم ڪري رهيا آهيون. هن چيو ته اسان لاهور کانپوءِ اسلام آباد جي صحافين ۽ سمورن پريس ڪلبن سان واڳيل صحافين کي صحت ڪارڊ جي اسٽيٽ آف دي آرٽ سهولت فراهم ڪرڻ وڃي رهيا آهيون. هن چيو ته ميڊيا جي ذريعي هڪ ڀيرو ٻيهر سنڌ حڪومت کي درخواست ڪريون ٿا ته اها به هن پروگرام ۾ حصو وجهي. هن چيو ته وزيراعظم جي لو ڪاسٽ هائوسنگ اسڪيم ۾ به صحافين کي شامل ڪيو ويو آهي، سمورا صحافي ان اسڪيم مان فائدو کڻڻ جا اهل هوندا، 5 مرلا تائين جي گهر تي 27 لک رپين تائين جو قرض ملندو، 3 لک رپين جي سبسڊي حڪومت پاران ڏني پئي وڃي. اطلاعات واري وفاقي وزير چيو ته پرنٽ ميڊيا کي ڊيجيٽلائيزيشن طرف اچڻو پوندو، جيئن جيئن انٽرنيٽ جي رفتار ۾ اضافو ٿيندو، ڊيجيٽل ميڊيا فارمل ميڊيا جي جڳهه وٺندي. هن چيو ته گذريل ٽن سالن ۾ 12 ارب رپين جي ايڊورٽائيزمينٽ فارمل ميڊيا کان ڊيجيٽل ميڊيا ۾ منتقل ٿي. وفاقي وزير چيو ته فائيو جي ٽيڪنالاجي ۾ وڏو انقلاب آهي، موجوده ميڊيا ماڊل کي ان انقلاب جي لاءِ تيار ٿيڻ گهرجي. چوڌري فواد حسين چيو ته ڪراچي پريس ڪلب وانگر لاهور پريس ڪلب کي به ڊيجيٽل ميڊيا ليب بڻائي ڏينداسين، ان ليب ذريعي صحافين کي وڊيو ايڊيٽنگ سميت ٻيون سهولتون ميسر هونديون، نوجوان صحافين کي سکڻ جا موقعا ملندا. هن چيو ته مالڪن سان سدائين ورڪنگ جرنلسٽس جي ڳالهه ڪئي، ڪجهه ڪئميره مينن ٻڌايو ته 7 سالن کان انهن جي پگهارن ۾ اضافو ناهي ٿيو. هن چيو ته 100 وڏين ڪمپنين اسٽاڪ ايڪسچينج ۾ 929 ارب رپين جو منافعو حاصل ڪيو، ميڊيا هائوسز به 35 کان 40 سيڪڙو منافعو حاصل ڪيو، ميڊيا مالڪن ۽ ڪمپنين کي پنهنجي ورڪرز جي پگهارن ۾ اضافو ڪرڻ گهرجي. هن چيو ته اسان ميڪرو اڪنامڪ پاليسيون ٺاهي رهيا آهيون، اڄ اسان جون انڊسٽريون هلي رهيون آهن، آبادگار خوشحال آهي، 1100 ارب رپيا زرعي شعبي ۾ منتقل ٿيا، معيشت 5 سيڪڙو جي شرح سان ترقي ڪري رهي آهي پر پگهاردار طبقي جي لاءِ مسئلا موجود آهن، انهن جي پگهارن ۾ اضافو نه ٿي رهيو آهي، جيستائين نجي شعبو ان ۾ پنهنجو حصو نه وجهندو اهي مسئلا حل نه ٿيندا. هن چيو ته اسان ورڪنگ جرنلسٽس کي مضبوط بڻائڻ چاهيون ٿا. نئين سڌارن ۾ نيوز پيپرز جي لاءِ آءِ ٽي اين اي ۾ اليڪٽرانڪ ورڪرز کي به حق ڏئي رهيا آهيون ته جيڪڏهن انهن جو ڪانٽريڪٽ پورو نه ٿو ٿئي ته اهي عدالت ۾ پنهنجو ڪيس داخل ڪري سگهن. هن چيو ته ورڪنگ جرنلسٽس جي خوشحالي ضروري آهي، ان جي لاءِ سڀني کي گڏجي ڪم ڪرڻو پوندو. هن چيو ته ميڊيا کي اداري جي حيثيت سان ڏسڻ گهرجي. برطانيا ۾ هن وقت بحث هلي رهيو آهي ته برطانوي وزيراعظم بورس جانسن لاڪ ڊائون لڳايو ۽ هو پاڻ سوشل سرگرمين ۾ مصروف رهيو جنهن تي برطانيا ۾ بحث شروع ٿي ويو ته لاڪ ڊائون لڳائي پاڻ ان تي عمل نه ڪرڻ تي برطانوي وزيراعظم جي ڪرسيءَ خطري ۾ پئجي وئي. اطلاعات واري وفاقي وزير چيو ته ميڊيا ۾ ڪوالٽي آف ڊبيٽ جي ضرورت آهي، ميڊيا ۾ پرويز خٽڪ ۽ حماد اظهر جي ڳالهه ٻولهه کي غيرضروري طور تي اڇاليو ويو. پرويز خٽڪ گئس جي فراهمي جو مطالبو ڪيو پر ڪنهن ٽي وي چينل تي اهو بحث نه ٿيو ته گئس جو مسئلو ڇا آهي؟ هن چيو ته پيپلزپارٽي پنهنجي حڪومت جي دور ۾ گئس جي اسڪيمن کي روڪي صحيح فيصلو ڪيو هو، جڏهن پيپلزپارٽي جي حڪومت وئي ته گئس تي ڪو گردشي قرض نه هو پر جڏهن (ن) ليگ جي حڪومت آئي ۽ شاهد خاقان عباسي گئس جي وزارت ڇڏي ويو ته 157 ارب رپين جو سرڪلر ڊيٽ ڇڏي ويو، جيڪي اسڪيمون انهن شروع ڪيون اهي مڪمل ڪرڻ جي لاءِ ساليانو 90 ارب رپيا گهربل آهن. هن چيو ته پاڪستان جو مستقبل روشن آهي، ڪجهه ماڻهن جو خيال آهي ته مهانگائي جي ڪري عمران خان جي ايندڙ اليڪشن جي لاءِ مقبوليت ۾ گهٽتائي آئي آهي. هن چيو ته عمران خان جو ڪراچي کان خيبر تائين، لاهور کان پشاور تائين، ڪشمير، گلگت بلتستان سميت هر جڳهه تي ووٽ بئنڪ آهي، ايندڙ اليڪشن اٽڪل 1100 سيٽن تي ٿيڻي آهي، پي ٽي آءِ کانسواءِ ڪنهن ٻي پارٽي جي حيثيت نه آهي ته اها ايترين سيٽن تي پنهنجا اميدوار بيهاري سگهي، (ن) ليگ سينٽرل پنجاب، پيپلزپارٽي اندرون سنڌ ۽ جي يو آءِ خيبرپختونخواهه جي ڪجهه علائقن جي پارٽي آهي، اليڪشن اچڻ ڏيو، ميدان به سامهون هوندو، اسان ڏيکارينداسين ته اليڪشن ڪيئن وڙهبي آهي. هن چيو ته ايندڙ 5 سال به عمران خان جي حڪومت هوندي. هڪ سوال تي اطلاعات واري وفاقي وزير چيو ته آءِ ٽي اين اي جو پراسيس مڪمل ٿي چڪو آهي، هڪ مهيني ۾ آءِ ٽي اين اي جي چيئرمين جي مقرري ٿي ويندي. ميڊيا ورڪرز جي پگهارن جي عدم ادائيگي تي اشتهار بند ڪرڻ جي سوال تي هن چيو ته جيڪي ميڊيا ادارا پنهنجي ورڪرز کي پگهارون ادا نه ڪري رهيا آهن افسوسناڪ آهي، اسان قانون موجب ئي هلي سگهون ٿا، جڏهن اسان اهو قانون کڻي آيا هئاسين ته پيپلزپارٽي ۽ (ن) ليگ ان جي مخالفت ڪئي ۽ ان کي پاس ڪرائڻ ۾ رڪاوٽ وڌي. ان ڏس ۾ ميڊيا جا ماڻهو پيپلزپارٽي ۽ (ن) ليگ سان به ڳالهه ڪن، ورڪنگ جرنلسٽس جي بل ۾ به اسان شق وجهڻ جي ڪوشش ڪئي ته ان ۾ به انهن رڪاوٽ وڌي، قانون کانسواءِ اسان ڪنهن جا اشتهار بند نه ٿا ڪري سگهون. هڪ سوال تي هن چيو ته پريس ڪلب جنهن صحافي جي ضمانت ڏيندو ان کي ڊيجيٽل صحافت جي لاءِ 5 لک رپين تائين جو قرض ڏينداسين. هڪ ٻئي سوال تي هن چيو ته لاهور ڊويزن ۾ هيستائين 5 هزار 669 ماڻهو صحت ڪارڊ مان فائدو کڻي چڪا آهن، جن ماڻهن کي علاج ۾ مشڪلاتون آهن اهي اسان کي آگاهه ڪن. هن چيو ته خيبرپختونخواهه صحت پروگرام ۾ توسيع ڪري ڇڏي آهي، گردي ۽ ليور ٽرانسپلانٽ کي به ان پروگرام ۾ شامل ڪري ڇڏيو آهي، وقت سان گڏ ان پروگرام ۾ وڌيڪ توسيع ڪئي ويندي. هڪ سوال تي هن چيو ته 700 ارب رپين جو سدرن بلوچستان پئڪيج ڏنو ويو، گوادر شهر جي لاءِ نئون مڪينزم جوڙي ڇڏيو آهي، ايندڙ 6 مهينن ۾ گوادر جا وڏا مسئلا حل ٿي ويندا. هڪ سوال تي اطلاعات واري وفاقي وزير چيو ته نواز شريف لنڊن جي سڀ کان مهانگي پراپرٽي ۾ رهي ٿو، آصف علي زرداري جڏهن لنڊن وڃي ٿو ته چرچل هوٽل ۾ مهانگي ترين اپارٽمينٽ ۾ رهائش اختيار ڪري ٿو، اڄ ملڪ ۾ مهانگائي جو مسئلو سڌوسنئون انهن سان واڳيل آهي. هن چيو ته 1947ع کان 2008ع تائين 6 ٽريلين رپين جو قرض ورتو ويو، ان رقم سان اسان فوج کي مضبوط ڪيو، گوادر شهر خريد ڪيو، اسلام آباد شهر ٺاهيو، اسان ائٽمي طاقت بڻياسين، 2008ع کان 2018ع تائين 23 ٽريلين جو قرض ورتو ويو. هن چيو ته پاڪستان تحريڪ انصاف جي حڪومت کي پنهنجي 5 سالن ۾ انهن ماڻهن جو ورتل 55 ارب ڊالر قرض واپس ڪرڻو آهي، هيستائين اسان 32 ارب ڊالر قرض واپس ڪري چڪا آهيون، اڄ ملڪ ۾ مهانگائي به انهن ماڻهن جي ڪري آهي، اسان انهن کي ڪيئن نظرانداز ڪري سگهون ٿا.

مضمون کا ماخذ : estatisticas lotomania

متعلقہ مضامین